साजरे होणारे सण

माजगावमध्ये विविध धर्मीय लोक एकत्र नांदत असल्यामुळे येथे अनेक सण उत्साहात साजरे केले जातात. रमजान ईद, बकरी ईद, मोहरम हे मुस्लिम समाजाचे प्रमुख सण आहेत. तसेच गणेशोत्सव, दसरा, दिवाळी, मकरसंक्रांत, होळी, गुढीपाडवा, आणि बौद्ध पौर्णिमा हे सणही मोठ्या उत्साहात साजरे केले जातात. या सणांमुळे गावात एकोपा, सौहार्द आणि उत्साहाचे वातावरण निर्माण होते.

स्थानिक मंदिरे

मजगावचे ग्रामदैवत म्हणजे श्री रामेश्वर मंदिर होय. हे मंदिर गावाच्या मध्यभागी वसलेले असून प्राचीन व धार्मिक दृष्ट्या अत्यंत महत्त्वाचे आहे. येथे दरवर्षी महाशिवरात्री आणि श्रावण महिन्यातील सोमवारी विशेष पूजा, अभिषेक आणि उत्सव साजरे केले जातात. या मंदिराभोवती शांत आणि नैसर्गिक वातावरण असल्यामुळे भाविकांना अध्यात्मिक शांतीचा अनुभव येतो. श्री रामेश्वर मंदिर हे मजगावच्या श्रद्धा आणि एकतेचे प्रतीक आहे.

मजगाव मध्ये जमातुल मुस्लिमीन मशीद (माहिगीर मोहल्ला) आणि जमातुल मुस्लिमीन मजगाव या आहेत. या दोन्ही मशिदी गावातील मुस्लिम बांधवांसाठी धार्मिक आणि सामाजिक केंद्र म्हणून कार्य करतात. येथे रमजान ईद आणि बकरी ईद हे सण मोठ्या उत्साहात साजरे केले जातात.

मजगाव मध्ये सर्व धर्मीयांमध्ये एकोपा आणि सौहार्दाचे वातावरण आहे.

लोककला

मजगाव गावातील लोककला पारंपारिक सण, नृत्य आणि संगीताशी घट्ट जोडलेली आहे. येथे शिमगोत्सव, होळी आणि गणेशोत्सव या काळात पारंपरिक ढोल-ताशा वादन, भजन-कीर्तन, आणि नाच-गाणी ही लोककलांची झलक दिसते. गावातील तरुण मंडळी शिमग्यात “फेरनाच” आणि “वेशभूषा नृत्य” सादर करतात, तर स्त्रिया पारंपारिक गाणी गातात. याशिवाय, कथाकथन, कीर्तन, आणि पारंपरिक वेशभूषेतील नाट्यरूप सादरीकरणे हीसुद्धा मजगाव परिसरातील लोककलांचा भाग आहेत, ज्यातून स्थानिक संस्कृतीचा वारसा पुढे नेला जातो.

स्थानिक पाककृती

मजगाव गावातील स्थानिक पाककृती महाराष्ट्राच्या कोकणाच्या पारंपारिक चवींवर आधारित आहेत. येथे मसालेदार आमटी, कोकणच्या फिश करी, मोदक, उकडीचे लाडू, अम्बा चटणी आणि वरण-भात यांसारख्या पारंपरिक पदार्थांना विशेष महत्त्व आहे. सणावार आणि उत्सवाच्या वेळी या पदार्थांची खास तयारी केली जाते. समुद्रकिनारी असल्यामुळे ताजी मासळी वापरून बनवलेले पदार्थ आणि कोकम, तिखट व नारळाचे स्वाद या पाककृतींना खास अद्वितीय चव देतात. गावातील प्रत्येक घरात पारंपारिक पद्धतीने स्वयंपाक केला जातो आणि हा स्थानिक वारसा पुढे नेला जातो.

मजगावमध्ये हिंदू, बौद्ध आणि मुस्लिम असे तिन्ही समाज एकत्र नांदतात. तथापि, येथे मुस्लिमांची संख्या तुलनेने जास्त आहे. मुस्लिम मोहल्ल्यातील पाककृती विशेषतः मसालेदार आणि चविष्ट असतात. चिकन, मासे, तसेच विविध प्रकारचे मसालेदार पदार्थ येथे प्रसिद्ध आहेत. याशिवाय साखरोळ्या, काकडीचे वडे यांसारख्या पारंपरिक पदार्थांचाही येथे मोठ्या प्रमाणात आस्वाद घेतला जातो. विविध धर्मीय समाज आणि त्यांच्या खास खाद्यसंस्कृतीमुळे माजगावचे सामाजिक जीवन रंगतदार आणि समृद्ध बनले आहे.

हस्तकला

मजगाव गावातील हस्तकला हा स्थानिक संस्कृतीचा महत्त्वाचा भाग आहे. येथील गावातील महिला अत्यंत उद्यमशील आहेत. त्या स्वतःच्या कष्टावर आधारित लघुउद्योग चालवतात. गावातील महिला बॅग तयार करणे, गोधड्या शिवणे, तसेच संक सेंटर (सुई–धाग्याचे प्रशिक्षण केंद्र) चालवतात. या माध्यमातून त्या आर्थिकदृष्ट्या स्वावलंबी होत असून गावाच्या सर्वांगीण विकासात हातभार लावत आहेत.